Antwort vom Stachelbeeri | |
uff d Froog: wie erläbt men e Oobe as Schnitzelbangg Sänger (ca.1990) |
Vom Comité bikunnsch e Lischte, Anhand vo däre muesch uff d Pischte. Uff mynere stoht - i gsehs sofort Am siibeni Start zur Route Nord. Und i muess, das präg mer bsunders y, Punggt Elfi vor der Jury sy! Sunscht mache die e scheens Halloo: Also vier Stund bis no Buffalo. Nach lengerem Amarsch stand i doof Am sibeni vor em Münchnerhoof. I hool dief Luft wie der Caruso- Doo sait e Källner: "Ancora chiuso!" Fir d Unterschrift und e Glessli Vino Spil i uff em Örgeli: Tschau tschau Bambino, Uus der Kuchi kemme zwai Tamile Und betrachte d Helge, myni Als nägschte Fixpunggt uff der Pischte Stoht s Hotel Europe uff der Lischte Der Chef kunnt z rase, e digge, glaine: "Gang in d Halle, nimm schnäll aine, Im Momänt singt grad e Grubbe, Denn serviere mir zerscht Suppe. Sobald as alli d Leffel schwinge, Darfsch du denn dyni Liedli singe. Verlosse hogg i im Entrée doo: No zwaiehalb Stund bis Buffalo. Denn sing i my Bangg mit bsunderem Schmalz, Verschienei schrei nach Pfäffer und Salz. Im Ryfälderhoof haissts: "Nimm none Stange, Am Buffet stehn scho vier Bängg Schlange!" Ändlig asit der Gastwirt: "Kumm!" Erlychteret hängg i my Örgeli um Und mach my dra, uffs Podium z jugge! Doo vernimm i s Kommando vonere Gugge! Zerscht spile sy mit Larven aa: "Wir sind mit dem Radel da", Denn ohni Larve der Narhallamarsch Und ych ha dänggt: oh lago mio, als Drygoob dien sy e Samba bringe, Druffabe lehns my gnädigscht singe! Denn ha mer gsait: bressier e Bitz Und flitz durab ins Cafe Spitz. E VSG, 2 BSG, 3 Comité und ain wo gammlet Hänn sich im Windfang scho versammlet Und warte dert mit Zitterschaiche Vom Färnseh uff ihr Uffdrittszaiche! S git e Sandwich und ebbis z dringge; Und s duet mer stingge, wo s mer wingge. Noh der Proschtitution im Schynwärferliecht Bin i schwaissiberstreemt Richtig Schiffländi gsiecht. Bim Lauf iber d Rhybrugg ischs ysig und windig, Wenn i Schwain ha, bikumm i kai Lungenentzindig! Jetz stand i am Rhysprung, d Versuechig isch doo, Uss zytligge Grind s Cochon d'Or z ibergoo. Doch denn han i dänggt, das wär iberdribe, Dä het doch so hässig im Comité gschribe, I sing der erscht Värs und wart uff e Gschrei, Doo froggt my ain: "What did you say?" Jänu, ha mer gsait, my Pflicht han i doo: Und gnabb none Stund bis Buffalo! Also loos Richtig EPA und dert um en Egge. Yglemmt zwische de Schnurebegge Und der VauKhaBe wo abwärts zieht, Han i my der Spalebärg uffe bemieht. Uff my Bitt an Vortrag: "Lehnd my schnäll dure" Froggt aine frindlig: "Wottsch e baar uff d Schnuure?" Drum sitz i jetz fescht, derby sott i goh: No dryssig Minute bis Biffalo! Der Laiezorn lohn i uss, doo kasch speeter no goh, S blybe nur no 10 Minute bis Buffalo. Drum mach my uff d Sogge, inklusiv Kater Und segglen im Ziggzagg durch d Lyt zem Theater. Uff d Minute bin i däwäg - und do bin i froh - Havariert aber pinggtlig in Buffalo. Me spändet mer Loob - i syg zwoor zer Zyt, Aber mit singe syg in nägschter Zyt nyt. S warte no säggs, wo d Jury muess priefe, Gang sitz doch ane, mer dien der denn riefe. |
|